مش عارف ليه مش بحب أتابع المسلسلات المصرية في رمضان .... مع إني مصري و أبويا مصري .... بسماري و لوني مصري ....
لكن السنه دي رمضان كان مختلف ... أنا متابعتش المسلسل ده أوي - قصدي بتاع شرف فتح الباب - لكن لفت إنتباهي النيو لوك بتاع الفنان يحي الفخراني و انا باقلب في قنوات الدش ... و هنا .... جه في بالي سؤال ... همه الممثلين بيصلوا زيينا ؟؟ .... و بعدين جه سؤال تاني ... لو كانوا فعلاً بيصلوا زيينا ، طب ليه مش باين عليهم - قصدي زبيبة الصلاة - ..... إتناقشت في الموضوع ده مع واحد صاحبي و كان رده إن فيه دعاه مشهورين زي الدكتور / عمرو خالد و الداعية مصطفى حسني ... مافيهومش زبيبة الصلاة ... قولت وماله ... بس أنا عمري ما شوفت ممثل فيه زبيبة صلاة إلا قليل .... يعني مثلاً الممثل حسين الشربيني كان مرة مطلوب منه إنه يمثل دور واحد محتل أجنبي ... و الماكيير إللي كان في المسلسل طلع عينه عشان يقدر يشيل زبيبة الصلاة ....
كمان فيه ممثل مغمور إللي كان بيطلع في إعلانات موبينيل مع ياسمين عبد العزيز .... الراجل ده زبيبة الصلاة فيه كبيرة ... و لما عمل إعلان ألوهات مشالهاش ... مع إنه كان المفروض إنه بيعمل دور واحد شرير ....
نيجي بقى للحاج شرف فتح الباب ... مؤلف المسلسل كان عاوز يوضح إن شرف فتح الباب ده إنسان مصري أبسط من البساطة .... بيفطر فول و طعمية و بينزل يصلي في الجامع .... مش عارف إن كان ملامح الشخصية دي رسمها المؤلف و لا المخرج ولا الفنان يحي الفخراني ... بس المهم إن الكاراكتر إللي كان معمول معجبنيش ... بل على العكس .... ده أثبتلي إن فيه فروق طبقية في مصر .... و إن الناس اللي فوق مش متدينة .... و الناس إاللي تحت بتعرف ربنا .... ولا إنت إيه رأيك ؟
1 comment:
مبروووك البلوج الجديد يا احمد
وانا مبسوط اني اول واحد ارد
__________
عمر التدين ما كان بعلامة الصلاة
ولا فروق طبقيه ولا حاجه بس انت تلاقيك مشفتش المسلسل كله
((:
انا شفته كله
والموضوع كبير قوي
((:
Post a Comment